कामरेड माधव नेपाललाई बधाई !

गत बिहीबार दिउँसोदेखि पूर्वप्रधानमन्त्री माधवकुमार नेपालमाथि भ्रष्टाचारको मुद्दा दायर भएको समाचारले नेपालको सञ्चार क्षेत्र तरंगित भएको छ । समाचारका दृष्टिले महत्वपूर्ण भएकाले सञ्चार क्षेत्रमा हलचल पैदा हुनु त स्वाभाविकै हो, राजनीतिको उच्चतम वृत्तमा पनि कौतूहलपूर्ण सानोतिनो हुरी आएको छ । नेपालमा पहिलोपटक पूर्वप्रधानमन्त्रीविरुद्ध औपचारिक रूपमा अभियोग लागेको हुनाले पनि एकखाले विशेष हलचल देखापरेको हो । त्यसो त ज्ञानेन्द्रको १५ महिने शासनकालमा पूर्वप्रधानमन्त्री शेरबहादुर देउवालाई भ्रष्टाचारको अभियोग लगाएर बन्दी बनाइएको थियो ।

पञ्चायत कालमा पनि पूर्वप्रधानमन्त्री तुलसी गिरीमाथि कार्पेट काण्डमा आरोप लागेको थियो । तर, इतिहासले देउवामाथि भएको कारबाहीलाई राजनीतिक प्रतिशोध मान्यो भने तुलसी गिरीमाथिको कारबाहीलाई ‘सुविधाअनुरूपको दरबारी स्टन्ट र त्यसैअनुरूपको सफाइ’को रूपमा लियो । आजको माधव नेपालविरुद्धको कदम के हो त ? के यो गम्भीर मामिला हो ? अथवा ‘छोरी कुटेर बुहारी तर्साउने’ चाल हो ? जवाफ सजिलो छैन । माधव नेपालविरुद्ध कारबाही सुरु हुने बित्तिकै मन्त्रिपरिषद्को नीतिगत निर्णयमा प्रश्न उठाउन नपाउने भाष्य खण्डित भएको छ ।