कसरी भएको थियो खनियाबास विद्रोह ?

खनियाबास घर भएकी पुतली तामाङको घरबाट धान बरामद भयो । यस स्थानको सल्लाघारी गाउँबाट चोरी भएको धान खोजी गर्दैजाँदा यिनको घरमा भेटिएको थियो । यसपछि सो घटनालाई स्थानीयस्तरबाटै समाधान गर्न सकिन्थ्यो । त्यो धान चोरी हुनुको मुख्य कारण के थियो ? यसको कारण खोजी गरेर समस्यालाई सहजै रूपमा समाधान गर्न सकिन्थ्यो । तर, त्यसतर्फ कोही लागेको देखिएन ।

यस कमजोरीका कारण समाजमा ध्रुवीकरण सुरु भयो । पारिवारिक, सामाजिक र राजनीतिकलगायतका कारणहरू जोडिँदै गए । यस घटनाले तामाङ परिवार र समुदायले पहिलेदेखि नै गर्दै आएको अन्यायको अनुभूतिलाई बलियो बनायो । न्यायको खोजी गर्दैगर्दा समयमा न्याय प्राप्त हुन सकेन । कमजोर वर्गले सहजै न्याय नपाउने समय थियो नै । सशक्त आवाज उठाउनु एउटा बाध्यात्मक विकल्प बन्यो । अर्कोतर्फ जीवनयापनको न्यूनतम आवश्यकता पूरा गर्न निकै संघर्ष गर्नुपर्ने समय पनि थियो ।