रोमाञ्चक खेलमा गुजरात टाइटन्सको १ रनको जित, दिल्ली क्यापिटल्स चुक्यो

काठमाडौँ । बुधबार सम्पन्न आईपीएलमा गुजरात टाइटन्सले दिल्ली क्यापिटल्सलाई मात्र १ रनको झिनो अन्तरले पराजित गरेको छ । उच्च स्कोर बनेको खेलमा अन्तिम बलसम्म दुवै टोलीको जितको सम्भावना रहेको थियो ।

टस जितेर पहिले ब्याटिङ गरेको गुजरात टाइटन्सले निर्धारित २० ओभरमा ४ विकेट गुमाएर २१० रनको विशाल योगफल तयार पारेको थियो । गुजरातका लागि शुभमन गिलले सर्वाधिक ७० रन बनाए । उनले ४५ बलको सामना गरे । त्यसैगरी, वाशिङ्टन सुन्दरले ३२ बलमा ५५ रन र जोस बटलरले २७ बलमा ५२ रनको उत्कृष्ट अर्धशतकीय पारी खेले। दिल्लीका बलरहरूमध्ये मुकेश कुमारले २ विकेट लिए भने लुंगी एनगिडी र कुलदीप यादवले १-१ विकेट हात पारे ।