लामिछानेको विषयमा सडक प्रदर्शनबाट पछि हट्यो रास्वपा

काठमाडौँ — सहकारी ठगी, संगठित अपराध र सम्पत्ति शुद्धीकरणमा अनुसन्धानका लागि कास्की प्रहरीको हिरासतमा रहेका पार्टी सभापति रवि लामिछानेलाई बाहिरै राखेर छानबिन हुनुपर्ने माग गर्दै विरोध प्रदर्शनमा उत्रिने घोषणाबाट राष्ट्रिय स्वतन्त्र पार्टी (रास्वपा) पछि हटेको छ । मंगलबार र बुधबार बसेको रास्वपा केन्द्रीय समितिको बैठकमा नै विरोध भएपछि तत्कालका लागि सडक प्रदर्शन नगर्ने निर्णय भएको हो ।

आइतबार रास्वपा केन्द्रीय कार्यालयमा पत्रकार सम्मेलन गरेर उपसभापतिद्वय डीपी अर्याल र स्वर्णिम वाग्लेलगायतले लामिछानेलाई हिरासतबाहिरै राखेर अनुसन्धान हुनुपर्ने माग राखी मंसिर ८ देखि सडक प्रदर्शन गर्ने घोषणा गरेका थिए । केन्द्रीय समिति बैठकमा भने प्रदर्शन गर्न नहुने बरु रचनात्मक आन्दोलनमा लाग्नुपर्ने माग उठेपछि फरक निर्णय भएको हो ।