धवलशमशेर बन्दै छन् नयाँ पार्टीको अध्यक्ष, दुर्गा प्रसाईं सर्वमान्य नेता

राष्ट्रिय प्रजातन्त्र पार्टी (राप्रपा) छोडेर नयाँ पार्टी बनाउन लागेका धवलशमशेर राणा समूहले मेडिकल व्यवसायी तथा अभियान्ता दुर्गा प्रसाईसँग मिलेर नयाँ पार्टी घोषणा गर्ने तयारी गरेका छन् ।

उक्त पार्टीको अध्यक्ष धवलशमशेर राणा बन्ने भएका छन् । प्रसाईं भने सर्वमान्य नेता हुने भएका छन् । उक्त पार्टीले पूर्णआकार भने आउने साता लिनेछ ।

राणानिकटहरूको भनाइमा अध्यक्षमा राणा र सर्वमान्य नेता चयन गर्न आन्तरिक सहमति भइसकेको छ । त्यही सहमतिअनुसार उनीहरूले पार्टीको संरचना बनाउने तयारी गरेका छन् ।

राणा र प्रसाईंको आन्तरिक सहमतिपछि पार्टी निर्माणमा लागि दुईवटा समिति गठन गरिएका छन् । पार्टीको विधान, नाम र चिह्नलगायतका लागि एउटा कार्यदल बनेको छ । उक्त कार्यदलको नेतृत्व मुकुन्दश्याम गिरीले गरेका छन् । समितिमा ११ जना छन् ।

त्यसैगरी, असन्तुष्ट र सम्भावित व्यक्तिहरूलाई पार्टीमा भित्र्याउन राजु आचार्यको नेतृत्वमा ५ सदस्यीय वार्ता टोली बनेको छ ।

प्रकाशित मिति: आइतबार, जेठ ३१, २०८३

१३:४४