इराकमा तीन वर्षदेखि ‘बन्धक’ छिन् झापाकी कमला मुर्मु, उद्धार गरिदिन आमाकाे हारगुहार

झापाकाे अर्जुनधारा नगरपालिका–६ की ३० वर्षीया कमला मुर्मु इराकमा अज्ञात गिरोहको बन्धक बनेको जनाउँदै उनकी आमाले उद्धारका लागि अपिल गरेकी छन् । तीन वर्षअघि विसं २०७७ भदौ १० गते वैदेशिक रोजगारीका क्रममा ओमान लाने भनेर कमलालाई मानव तस्करले इराक पुर्‍याएर बेचेको उनकी आमा लखी मुर्मुले जानकारी दिइन् ।

'ओमान लाने भनेर इराक पुर्‍याएछन्', पीडितकी आमा लखीले कमलाको फोटो देखाउँदै भनिन्, 'छ महिनासम्म कुनै सम्पर्क हुन सकेन । त्यसपछि भ्वाइस म्यासेजमार्फत बेला–बेला एकोहोरो सम्पर्क हुँदा छोरीले मलाई बन्धक बनाइएको छ, उद्धार गर्नुपर्‍याे आमामात्र भनिरहेकी छन् ।'