अमेरिकाको मागमा किमको कडा चेतावनी : परमाणु हतियार त्याग्ने प्रश्नै उठ्दैन

सोल : उत्तर कोरियाले आफ्नो परमाणु हतियार कार्यक्रमबारे अत्यन्त कडा र अडिग अडान सार्वजनिक गर्दै ‘रातो रेखा’ कोरेको छ । किम जोङ उन नेतृत्वको देशले परमाणु निशस्त्रीकरणको विषयलाई ‘अपरिवर्तनीय रूपमा अन्तिम टुंगो लागेको मुद्दा’ भन्दै अमेरिका तथा उसका सहयोगी राष्ट्रहरूको निरन्तर दबाबलाई पूर्ण रूपमा अस्वीकार गरेको छ ।

कोरियन सेन्ट्रल न्युज एजेन्सीमार्फत जारी आधिकारिक वक्तव्यमा उत्तर कोरियाली विदेश मन्त्रालयका प्रवक्ताले परमाणु हतियार त्याग्नुपर्ने मागलाई ‘पूर्णतः अतार्किक बहस’ र ‘काल्पनिक दिवास्वप्न’ मात्र भएको बताएका छन् । प्रवक्ताले बाह्य दबाब, धम्की वा कुनै पनि प्रकारको सैन्य कारबाहीले उत्तर कोरियाको परमाणु शक्ति सम्पन्न राष्ट्रको हैसियतमा कुनै परिवर्तन ल्याउन नसक्ने स्पष्ट पारे । उनका अनुसार अमेरिका र उसका सहयोगीहरूले गरिरहेका बयानबाजी, परमाणु धम्की तथा आक्रामक नीतिहरूले उत्तर कोरियाको वर्तमान स्थिति कमजोर बनाउन सक्दैनन् ।