बाह्रखरीकर्मी सेजुवालसहित सुर्खेतका नौ पत्रकार पुरस्कृत

सुर्खेत । नेपाल पत्रकार महासंघ सुर्खेत शाखाले बाह्रखरीकर्मी विवशकुमार सेजुवालसहित नौ पत्रकारलाई पुरस्कृत गरेको छ । आइतबार सुर्खेत शाखाले आयोजना गरेको कार्यक्रममा कर्णाली प्रदेशका मुख्यमन्त्री यामलाल कँडेलले पुरस्कृत गरेका हुन् ।

सेजुवाल ‘खानेपानी तथा सरसफाइ पत्रकारिता पुरस्कार–२०८२’बाट पुरस्कृत भएका छन् । महासंघले सरसफाइका विषयमा निरन्तर कलम चलाउँदै जनचेतना अभिवृद्धिमा योगदान पुर्‍याएको भन्दै उक्त पुरस्कार प्रदान गरेको हो ।

यसैबीच महासंघले ‘प्रेस स्वतन्त्रता सम्मान–२०८२’ बाट शाखाका पूर्वअध्यक्ष दुर्गा थापा, उपाध्यक्ष डम्मर आचार्य र माया थापालाई पुरस्कृत गरेको छ । ‘विकास तथा शान्ति पत्रकारिता पुरस्कार–२०८२’बाट हिमालयन टेलिभिजनका रमेशकुमार पाण्डे र रेडियो नेपालकी करिस्मा चौधरी पुरस्कृत भएका छन् ।

त्यसैगरी ‘युवा पत्रकारिता पुरस्कार–२०८२’ बाट रेडियो भेरीका टेकराज केसी, नन्दु गेलाङ स्मृति पत्रकारिता पुरस्कार–२०८२ बाट राष्ट्रिय समाचार समिति (रासस)का सुरेश आचार्य, सक्रिय पत्रकारिता पुरस्कारबाट कान्तिपुरकी तृप्ती शाही तथा वर्ष पत्रकारिता पुरस्कार–२०८२ बाट ईश्वर अधिकारी पुरस्कृत भएका छन् ।

#नेपाल पत्रकार महासंघ

#विवशकुमार सेजुवाल