‘सरकारी कार्यालयको लाइनमै बित्ने भयो आधाउधी जिन्दगी !’

लक्ष्मीप्रसाद पौडेल -

सुर्खेत : गाउँगाउँमा अधिकार सहितका स्थानीय सरकार आएसँगै सार्वजनिक सेवा प्रवाहमा सहजता थपिएको महसुस गरेको धेरैले भन्ने गरेका छन् । स्थानीय तहमा आफैँले निर्वाचित गराएर पठाएका जनप्रतिनिधि भएपछि सेवा लिन सहज त हुने नै भयो। तर संविधानले सबै सेवा स्थानीय तहबाटमात्र लिन पाउने व्यवस्था गरेको छैन । नागरिकता, राहदानी र राष्ट्रिय परिचयपत्र लगायतका सेवा लिन जिल्ला सदरमुकाममा रहेका जिल्ला प्रशासन कार्यालयमा जानैपर्छ । कतिपय जिल्लामा इलाका प्रशासन कार्यालय पनि छन् जो भौतिक दूरीको हिसाबले जिल्ला प्रशासन कार्यालयमा जानुभन्दा केही नजिक हुन सक्छन् । यस ब्लगमा मैले जिल्ला प्रशासन कार्यालय सुर्खेतमा सार्वजनिक सेवा लिन जाँदाको आफ्नो र सार्वजनिक सेवा लिन गएका अरुका कुरा सुनेपछिका सन्दर्भलाई उठाउन खोजेको हुँ।