दुई नेताको गठबन्धन चीनका लागि कम्फर्टेबल बनेको त होइन ? (भिडियो रिपोर्ट)

माउण्टेन टेलिभिजन एचडी । नेकपा माओवादी केन्द्रका अध्यक्ष प्रचण्ड प्रधानमन्त्री भएलगत्तै चीनले उत्तरी नाका सहज बनाउने निर्णय लिनुलाई संयोग मात्र मान्न सकिदैन । त्यसमाथि ब्रिक एण्ड रोड इनिसिएटिभ (बीआरआई) परियोजना अन्तर्गतको रेल सर्भेको काम पनि अगाडि बढेको छ । दक्षिणका मिडियाले प्रचण्डलाई मात्र नभई नेकपा एमालेका अध्यक्ष केपी शर्मा ओलीलाई जोडेर ‘चीनपरस्त’ उल्लेख गरिरहँदा पछिल्लो विकसित घटनालाई अर्थपूर्ण मानिएको छ ।

चीनका राष्ट्रपति सी चिनफिङ पहिलोपटक सन् २०१२ मा राष्ट्रपति हुँदा प्रथम भेट गर्ने उच्चतहका विदेशी नेता थिए प्रचण्ड । चिनियाँ कम्युनिस्ट पार्टीका संस्थापक मओत्से तुङले प्रतिपादन गरेको माओवादको सिद्धान्तलाई अंगालेकोले पनि प्रचण्डप्रति चीन उदार नै देखिदै आएको छ । माओवादी सत्तामा पुग्दा चिनियाँ उच्च अधिकारीहरुको ओहोरदोहोर बाक्लो हुनेगरेको छ ।