भैँसी खोज्न निस्किएका जयसिंहको शव भिर नजिक फेला

बैतडीको पाटन नगरपालिका–८ निवासी ६८ वर्षीय जयसिंह महराको शव फेला परेको छ ।

तीन दिनअघि भैँसी खोज्ने क्रममा घरबाट निस्किएका महरा सम्पर्कविहीन भएपछि प्रहरी र स्थानीयवासीले संयुक्त रूपमा खोजी अभियान सञ्चालन गरेका थिए ।

खोजीका क्रममा उनको शव पाटन नगरपालिका–२, थडकुडास्थित बाटो नजिकैको भिर क्षेत्रमा फेला परेको इलाका प्रहरी कार्यालय पाटनले जनाएको छ ।

प्रहरीका अनुसार महरा गाउँकै आफन्तसँग भैँसी खरिदका लागि गएका थिए । भैँसी खरिदको प्रक्रिया पूरा भएपछि उनी “म घरतिर जान्छु” भन्दै आफन्तबाट छुट्टिएका थिए । त्यसपछि उनी घर नपुगेपछि परिवारले खोजी सुरु गरेको थियो ।

महरा लगातार तीन दिनसम्म सम्पर्कमा नआएपछि स्थानीयवासी, आफन्त र प्रहरीको सक्रिय सहभागितामा शनिबारदेखि व्यापक खोजी अभियान सञ्चालन गरिएको थियो । रातिको समयमा समेत खोजी कार्यलाई निरन्तरता दिइएको थियो ।

खोजी अभियानकै क्रममा आइतबार उनको शव थडकुडाको भिर नजिक फेला परेको हो । घटनास्थलमा मुचुल्का उठाउने तथा अन्य कानुनी प्रक्रिया अघि बढाइएको प्रहरीले जनाएको छ । घटनाको वास्तविक कारण खुल्न बाँकी रहेकाले थप अनुसन्धान भइरहेको इलाका प्रहरी कार्यालय पाटनले जानकारी दिएको छ ।

मृतक महराको शव पोस्टमार्टमका लागि पाटन ल्याउने तयारी गरिएको छ । उनको निधनप्रति स्थानीयवासी तथा आफन्तजनले दु:ख व्यक्त गरेका छन् ।