पृथ्वी राजमार्ग: राजमार्ग अवरोधले रोकियो पोखरा–काठमाडौं यात्रा

राष्ट्रबैंकचोकस्थित पर्यटक बसपार्क आजकल सुनसान छ। हरेक दिन बिहान र बेलुकी बसपार्कबाट छुट्ने बस चढ्न विदेशी पर्यटकदेखि स्वदेशी यात्रुको बसपार्क आउजाउ चलिरहन्थ्यो। लेकसाइडका होटलमा बसेका अधिकांश विदेशी पर्यटक बस चढ्न त्यही बसपार्क आउँथे। बिहान ९ बजेसम्म र बेलुकी पनि ९ बजेसम्मै बसपार्क क्षेत्रमा यात्रामा निस्कने यात्रुको चहलपहल हुन्थ्यो। विभिन्न गन्तव्यबाट पोखरा भित्रिएका बसको पनि दिउँसो २ बजेपछि भीड थपिन्थ्यो।

तर, झन्डै दुइसातादेखि पर्यटक बसपार्क सुनसान छ। बिहान र बेलुकी बस चढ्न अहिले कोही पनि बसपार्क आउँदैनन्। पोखराका विभिन्न ठाउँबाट छुट्ने बस पनि बजारका ठाउँठाउँबाट यात्रु चढाउँदै अन्तिममा राष्ट्रबैंकचोकको बसपार्क पुगेर यात्रुलाई लिएर गन्तव्यमा निस्कन्थे। तर, अहिले पर्यटक बसपार्क क्षेत्र पुरै सुस्ताएको छ।