अमेरिकामा बसोबास गर्ने नेपालीहरूले मनाए भाइटीका
ratopati.com
अमेरिकामा बसोबास गर्ने नेपालीहरूले गत वर्षभन्दा यसपटक रमाइलो गरेर भाइटीका मनाएका छन् । गत वर्षको तुलनामा कोरोना सङ्क्रमण न्यून हुँदै गएकोले रमाइलोसँग मनाउन पाएका हुन् । नेपालमा भाइटीकाको उत्तम साइत ११:०२ बजे तोकिएकोले त्यही साइतमा पनि अमेरिकामा टीका लगाइएको छ । अमेरिकामा भाइटीकाको टीका दिनभर लगाउन कुनै बाधा नभए पनि साइत खोज्नेका लागि मध्याह्न ११ः२५ बजेको समय उत्तम भनिएकाले अमेरिकामा बसोबास गर्ने नेपालीहरूले पनि यही समयमा पनि टीका ग्रहण गरेका छन् । अन्तर्राष्ट्रिय पञ्चाङ्ग निर्णय समितिले विभिन्न देशमा भाइटीकाको साइत सार्वजनिक गरे पछि त्यस समयलाई पनि धेरैले पछ्याएका छन् ।
अमेरिकामा विभिन्न राज्य तथा सहरहरूको समय कतै १ घण्टा, कतै २ घण्टा र कतै ३ घण्टाको समेत फरक भएकाले स्थानीय समय अनुसार नेपाली समुदायले भाइटीका लगाएका छन् । अमेरिकामा तिहारका सबै सामाग्रीहरू भारतीय र नेपाली समुदायले खोलेका पसलमा पाइने हुनाले तिहार मनाउन सजिलो हुने गरेको छ । भाइटीकामा दिदीबहिनीले दाजुभाइलाई तेलको धाराले छेकेर परम्परा अनुसार सप्तरङ्गी वा पञ्चरङ्गी टीका, मखमली, सयपत्री र गोदावरीलगायतका फूलका माला लगाइदिएका छन् । सेलरोटी र अन्य सामाग्रीहरू दिदीबहिनीहरूले आफैँ बनाएका छन् ।
स्रोतमा पूरा पढ्नुहोस् (ratopati.com)