सुनीतालाई घरमै नागरिकता

पर्वत। जन्मेदेखि नै पूर्ण अपांगताको जीवन बिताउँदै आएकी पर्वतको जलजला गाउँपालिका ४‚ फड्केढुंगाकी २४ वर्षीया सुनीता विकले घरमै नागरिकता पाएकी छन्।

चौबीसै घण्टा बिस्तारामै पल्टिरहने भएका कारण परिवारले सदरमुकाम कुस्मामा रहेको जिल्ला प्रशासन कार्यालयसम्म ल्याउन नसक्ने भएपछि आज घरमै लगेर नागरिकता वितरण गरिएको हो। प्रमुख जिल्ला अधिकारी लक्ष्मीप्रसाद पौडेलसहित कार्यालयका कर्मचारी, स्थानीय वडाध्यक्ष भरत जीसीलगायतको सहभागितामा नागरिकता हस्तान्तरण गरिएको हो।