आईपीएल २०२६ अक्सनः ग्रीनले बनाए कीर्तिमान, चेन्नईद्वारा अनक्याप्ड खेलाडीमाथि २८ करोड बढीको खर्च

काठमाडौँ। आईपीएल २०२६ को अक्सन मंगलबार रोमाञ्चक रूपमा सम्पन्न भएको छ, जहाँ १० वटा फ्रेन्चाइज टोलीहरूले कुल ७७ खेलाडीका लागि २१५.४५ करोड रुपैयाँ खर्चिएका छन् । यसपटकको अक्सनमा २९ जना विदेशी खेलाडीले पनि ठुलो रकम हात पारे । अक्सनको मुख्य आकर्षण अष्ट्रेलियाका क्यामरुन ग्रीन रहे, जसले आईपीएल इतिहासमै विदेशी खेलाडीका लागि अहिलेसम्मकै उच्च मूल्य पाए । तर, चेन्नई सुपर किंग्सले दुई युवा अनक्याप्ड (अन्तर्राष्ट्रिय खेल नखेलेका) खेलाडीमाथि गरेको अप्रत्याशित लगानीले क्रिकेट जगतलाई नै चकित पार्‍यो ।

कोलकाता नाइट राइडर्स र चेन्नई सुपर किंग्सबीचको तीव्र प्रतिस्पर्धापछि, केकेआरले अष्ट्रेलियाली अलराउन्डर क्यामरुन ग्रीनलाई २५.२० करोड रुपैयाँको कीर्तिमानी मूल्यमा आफ्नो टोलीमा भित्र्यायो । यो रकम कुनै पनि फ्रेन्चाइज प्रतियोगितामा विदेशी खेलाडीका लागि तिरिएको विश्वकै सर्वाधिक रकम हो । ग्रीनले आफ्नै देशका मिचेल स्टार्क (२४.७५ करोड) को रेकर्ड तोड्दै इतिहास रचेका हुन् ।