शक्तिखोर औद्योगिक क्षेत्रका रोकिएका काम अघि बढाउने प्रतिबद्धता

काठमाडौँ — शक्तिखोर औद्योगिक क्षेत्रमा वनसँग सम्बन्धित काम अघि बढाउने विषयमा सरोकारवाला निकायबीच छलफल भएको छ। वन तथा वातावरणमन्त्री माधवप्रसाद चौलागाईंको उपस्थितिमा मंगलबार भएको छलफलमा औद्योगिक क्षेत्र निर्माणमा देखिएका अवरोध हटाउन पहल गर्ने प्रतिबद्धता व्यक्त गरिएको छ।

मंसिर २९ गते चितवनका प्रमुख जिल्ला अधिकारी गणेश अर्याल, औद्योगिक क्षेत्र व्यवस्थापन लिमिटेडका महाप्रबन्धक पदम ओली र चितवन उद्योग वाणिज्य संघका पदाधिकारीको उपस्थितिमा शक्तिखोर औद्योगिक क्षेत्रको स्थलगत अनुगमन तथा अवलोकन गरिएको थियो। त्यसकै निरन्तरतामा पुस १ गते मन्त्री चौलागाईंसहित सम्बन्धित निकायबीच रोकिएका काम अघि बढाउनेबारे छलफल भएको हो।