प्रधानमन्त्री कार्यालयका ६८ जना कर्मचारीको दरबन्दी कटौती

काठमाडौं । प्रधानमन्त्री पुष्पकमल दाहाल ‘प्रचण्ड’ले प्रधानमन्त्री तथा मन्त्रिपरिषद् कार्यालयको पुनर्संरचना गर्न सुरु गरेका छन् । बिहीबार बसेको मन्त्रिपरिषद्को बैठकले प्रधानमन्त्री कार्यालयका ६८ जना कर्मचारीको दरबन्दी कटौती गर्दै पुनर्संरचनासहितको व्यवस्थापन गर्ने निर्णय गरेको हो ।

प्रधानमन्त्री कार्यालयको दरबन्दीमा व्यापक कटौती गरिएकाले त्यहाँ रहेकाहरू अन्यत्र जाने सञ्चार तथा सूचना प्रविधिमन्त्रीसमेत रहेकी सरकारकी प्रवक्ता रेखा शर्माले बताइन् । ‘प्रधानमन्त्री कार्यालयका ६८ जना कर्मचारीको दरबन्दी कटौती भएको छ, प्रधानमन्त्री कार्यालयमा रहनुभएका साथीहरू अब अन्यन्त्र कामकाजमा जानुहुन्छ,’ प्रवक्ता शर्माले भनिन्, ‘प्रधानमन्त्रीले एक वर्ष पुगेको अवसरमा जुन सम्बोधन गर्नुभयो, त्यसबेलामा प्रधानमन्त्री कार्यालयको पुनर्संरचना गर्छु भन्नुभएको थियो, आज यहाँबाट सुरुवात भयो, हामी विस्तार गरेर जान्छौं ।’