दक्षिण एसियाको पहिचान रातो पान्डा

रातो पान्डा नेपालको पहिचान हो । यसलाई स्थानीय भाषामा हाब्रे पनि भनिन्छ । यो स्तनधारी जीव हो । जीव विकासक्रमका हिसाबले यो मेरुदण्ड भएको जनावर हो । यसको रङ रातो हुने हुनाले यसलाई रातोपान्डा भनिएको हो । आकारमा बिरालोभन्दा केही ठूलो हुन्छ यो । शरीरमा प्रशस्त लामालामा रौं हुन्छन् यसका ।

यसलाई हिमालयको पूर्वी भेगमा पाइने जीवका रूपमा लिइन्छ । चीन पनि रातो पान्डा पाइने मुलुक हो । चीनको दक्षिण पश्चिमीको स्थानीय जीवका रूपमा रातो पान्डालाई गणना गरिन्छ । यसले निगालो तथा बाँसका टुसा औधी मन पराउँछ । भनिन्छ, पान्डा नाम पनि बाँस प्रजातिका बिरुवा खाएर बाँच्ने भएकाले भनिएको हो । यो दक्षिण एसियाली प्रजाति हो भनेर बुझ्दा पनि केही अन्याय हुँदैन । किनकि यो नेपाल, पश्चिम बंगाल, सिक्किम, अरुणाचल प्रदेश तथा भुटान र चीनका केही भागमा पाइन्छ ।