१४ दिनदेखि एउटै कोठामा ७ परिवारको बास

कञ्चनपुर — जमुना आधारभूत विद्यालयको एउटा कोठामा ७ वटा खाट राखिएका छन् । कोही खाटमा बसेका छन् । कोही भूइँमा । बालबालिका पनि कोही खाटमा त कोही भूइँमा थिए । बाढी घरमा क्षति भएपछि १४ दिनदेखि विद्यालयको एउटा कोठामा ७ परिवारका १७ जना बसिरहेका छन् ।

‘एउटा कोठामा धेरै जना सुत्दा अप्ठेरो हुन्छ, राति गर्मी पनि धेरै हुन्छ,’ पटेराखल्लाका ६५ वर्षीय लालसिंह सुनारले भने, ‘राति बाहिरभित्र गर्न समेत अप्ठेरो हुन्छ, बालबालिका च्यापिने डर पनि हुन्छ ।’