कैलाश मानसरोवर यात्रामा उत्साह : हुम्ला भएर तीन हजारभन्दा बढी भारतीय तीर्थयात्री

कैलाश मानसरोवर दर्शनको याम सुरु भएसँगै हुम्ला हुँदै यात्रा गर्ने भारतीय तीर्थयात्रीको सङ्ख्या उल्लेख्य रूपमा बढेको छ। हवाई मार्गमार्फत नेपाल प्रवेश गरेर सिमकोट–हिल्सा नाका हुँदै चीनको ताक्लाकोटतर्फ जाने यात्रु बढेपछि यस क्षेत्रको पर्यटन गतिविधि पनि तीव्र बनेको छ।

यस वर्ष हालसम्म तीन हजार ७८० भारतीय पर्यटकले नेपालगञ्ज–सिमकोट–हिल्सा मार्ग प्रयोग गर्दै कैलाश मानसरोवर दर्शनका लागि यात्रा गरिसकेका छन्। जिल्ला प्रहरी कार्यालयका अनुसार गत वैशाख ३० गतेदेखि तीर्थयात्री आउने क्रम सुरु भएको हो।