क्युबा अमेरिकाका लागि सुरक्षा खतरा भएको विदेशमन्त्री रुबियोको दाबी

काठमाडौँ । अमेरिकी विदेशमन्त्री मार्को रुबियोले क्युबाले अमेरिकाका लागि ‘राष्ट्रिय सुरक्षा खतरा’ खडा गरेको र शान्तिपूर्ण सम्झौताको सम्भावना ‘उच्च नरहेको’ बताएका छन् । सन् १९९६ मा दुईवटा विमान खसाली अमेरिकी नागरिकको हत्या गरेको अभियोगमा अमेरिकाले क्युबाका पूर्व राष्ट्रपति राउल क्यास्ट्रोविरुद्ध मुद्दा दायर गरेको भोलिपल्ट रुबियोको यस्तो कडा टिप्पणी आएको हो ।

बिहीबार पत्रकारहरूसँग कुरा गर्दै रुबियोले वासिङ्टनको प्राथमिकता ‘कूटनीतिक समाधान’ नै रहेको तर राष्ट्रपति डोनाल्ड ट्रम्पसँग आफ्नो देशलाई कुनै पनि खतराबाट जोगाउने अधिकार र दायित्व रहेको चेतावनी दिए । उनले क्युबालाई यस क्षेत्रकै ‘आतंकवादको प्रमुख प्रायोजक’ मध्ये एक भएको आरोप समेत लगाए । यता, क्युबाका विदेशमन्त्री ब्रुनो रोड्रिग्वेजले रुबियोको दाबीलाई ‘झूट’ को संज्ञा दिँदै आफ्नो देशले अमेरिकालाई कहिल्यै खतरामा नपारेको स्पष्ट पारेका छन् । रोड्रिग्वेजले सामाजिक सञ्जाल एक्समार्फत रुबियोले सैन्य आक्रमणलाई उक्साउन खोजेको र क्युबामाथि निर्ममतापूर्वक प्रहार गरिरहेको आरोप लगाए ।