५२ संवैधानिक पदाधिकारी नियुक्ति विवाद सर्वोच्चलाई निर्णय सुनाउन सकस

काठमाडौं । संवैधानिक आयोगका पदाधिकारी नियुक्तिविरुद्धको मुद्दामा सुनुवाइ सकेर २८ जेठमा निर्णय सुनाउने भनी पेशी तोकिएकामा अर्को मिति १८ असारलाई तोकिएको छ । २८ जेठका लागि पेसी तोकिएको भए पनि सर्वोच्च अदालतले फैसला सुनाउन सकेन ।

बुधबार यस मुद्दाको निर्णय सुनाउनका लागि संवैधानिक इजलासमा पेशी तोकिएको थियो । सर्वोच्चका प्रधानन्यायाधीश प्रकाशमानसिंह राउतका साथै न्यायाधीशहरू सपना प्रधान मल्ल, कुमार चुडाल, मनोजकुमार शर्मा र नहकुल सुवेदी दिनभर छलफलमा बसेर पनि निष्कर्ष निकाल्न सकेनन् । झन्डै साढे ४ वर्षदेखि सर्वोच्च अदालतमा रहेको यस मुद्दामा सुनुवाइमा बिलम्ब भएको भनेर चर्चा भइरहेको थियो । सर्वोच्चको संवैधानिक इजलासले मुद्दा परेको साढे ४ वर्षपछि नियुक्तिसम्बन्धी मुद्दामा अन्तिम सुनुवाइ यही २ जेठमा सकेको हो । २ जेठ बिहीबारको अन्तिम बहसपछि इजलासले निर्णय सुनाउने मिति २८ जेठका लागि तोकेको थियो । तर, सर्वोच्च अदालत २८ जेठमा निर्णय सुनाउन असमर्थ रह्यो ।