सिटिजन्स बैंकको वेबसाइट र मोबाइल बैंकिङमार्फत अब एसआईपी आवेदन गर्न सकिने

काठमाडौं । सिटिजन्स बैंक इन्टरनेसनल लिमिटेडले आफ्ना ग्राहकलाई डिजिटल माध्यमबाट नियमित लगानीको सुविधा उपलब्ध गराउने उद्देश्यले सिटिजन्स क्यापिटल लिमिटेड सँगको सहकार्यमा सञ्चालन गर्दै आएको ‘सिटिजन्स सदाबहार योजना (एसआईपी)’ मा अब बैंकको आधिकारिक वेबसाइट तथा मोबाइल बैंकिङमार्फत नै आवेदन दिन सकिने व्यवस्था सुरु गरेको छ ।

बैंकका अनुसार ग्राहकले डिजिबैंक सेवामार्फत बैंकको वेबसाइट वा मोबाइल बैंकिङ प्रयोग गरेर प्रत्यक्ष रूपमा एसआईपी आवेदन दर्ता गरी नियमित लगानी प्रक्रिया सुरु गर्न सक्नेछन् । यस व्यवस्थाले आवेदन प्रक्रिया थप सरल, छिटो र सुरक्षित बनाउनुका साथै ग्राहकलाई आफ्नो वित्तीय लक्ष्यअनुसार नियमित लगानी गर्न अझ सहज हुने बैंकको विश्वास छ ।