अरुले चाडपर्व मनाइरहँदा आफूले ड्युटी गर्नुपर्दा नरमाइलो लाग्थ्यो

म विसं २०४७ सालदेखि परोपकार स्त्री रोग अस्पतालमा नर्सका रुपमा कार्यरत्त छु। पेशागत जीवनको सुरुवातका समय घर परिवारसँग जमघट हुनुपर्ने तथा चाडपर्व मनाउनुपर्ने बेला ड्युटीका लागि हिड्नुपर्दा नरमाइलो लाग्थ्यो। विस्तारै ती सबै कुरालाई बिर्सिएर बिरामीको सेवामा नै आफूलाई समर्पित गराउन पाउँदा रमाइलो लाग्ने गरेको छ। विस्तारै आफ्नो पेशासँग सन्तुष्ट हुँदै गएपछि भने पेशागत जीवनसँगै खुसी मिलेको छ।

यसपालिको तिहारमा पनि मेरो पुरै दिन बिदा छैन। ड्युटी र पारिवारिक समयबीच सन्तुलन राख्दै यस वर्षको तिहार मनाउने मेरो सोचाइ छ। पूर्णरुपमा पारिवारिक सपोर्ट तथा आफ्नो कठिन मेहनतका कारण म आज यो पेशामा रहेको छु। मेरो दाई र आमाले मलाई नर्स नपढ्न धेरै पटक भन्नु भएको थियो। तर म आफ्नै इच्छामा नर्स बनेको हुँ।