सिमलताल दुर्घटनाः भारतीय र नेपाली उद्धार टोलीद्वारा आइतबारबाट संयुक्त रूपमा खोजी सुरु

काठमाडौं । एक साताअघि नारायणगढ–मुग्लिन सडकखण्डको सिमलतालमा पहिरोले बगाएर त्रिशूली नदीमा हराइरहेका दुईवटा बस र यात्रुको खोजीमा भारतबाट आएको नेसनल डिजास्टर रेस्पोन्स फोर्स र नेपाली सुरक्षाकर्मीको उद्धार टोलीले आइतबारबाट संयुक्त रूपमा खोजी सुरु गरेका छन् ।

खोजी कार्यका लागि भारतीय टोलीमा तीनवटा सोनार क्यामेरासहित चार जना गोताखोर र अन्य प्राविधिक गरी १२ जना रहेको चितवनका प्रमुख जिल्ला अधिकारी चन्द्रदेव यादवले जानकारी दिए । सो टोलीले सिमलताल पहिरोदेखि करिब ४ किलोमिटर क्षेत्रमा खोजी कार्य गरिरहेका छ । नेपाली उद्धार टोलीमा सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटारबाट नौ जना गोताखोरसहित २५ जना र नं. १७ गण चितवनबाट ११ जना विपद् व्यवस्थापन तालिमप्राप्तसहित ३५ जनाको सुरक्षा फौज उनीहरूको खोजी कार्यमा परिचालित भएको छ ।