कर्णाली राजमार्गमा भएको दुर्घटनाबारे रास्वपा सांसदले मागे गृहमन्त्रीको जवाफ

काठमाडौँ । राष्ट्रिय स्वतन्त्र पार्टी (रास्वपा) का सांसद रमेश प्रसाईंले कर्णाली राजमार्गमा बारम्बार भइरहेका दर्दनाक सवारी दुर्घटना र फितलो उद्धार कार्यबारे संसद्‌मा गृहमन्त्रीको आधिकारिक जवाफ माग गरेका छन्। सोमबार बसेको प्रतिनिधि सभा बैठकमा बोल्दै सांसद प्रसाईंले नागरिकको जीवन रक्षा गर्ने दायित्वबाट राज्य कुनै पनि बहानामा पन्छिन नपाउने चेतावनी दिए।

उनले कर्णाली राजमार्गमा हुने शृङ्खलाबद्ध दुर्घटनाहरूलाई राज्य र समाजले केवल एउटा सामान्य 'समाचारको विषय' मात्र बनाएको भन्दै कडा आपत्ति प्रकट गरे। नागरिकको जीवनभन्दा ठूलो सम्पत्ति र प्राथमिकता राज्यको अरू केही हुन नसक्ने उल्लेख गर्दै उनले हालै भएको दुर्घटनामा सरकारको उद्धार संयन्त्रको प्रभावकारितामाथि गम्भीर प्रश्न उठाए।