राष्ट्रिय राजमार्गहरूमा अर्बौं लगानी, प्रगति सुस्त

सरकारले राष्ट्रिय राजमार्गहरूको स्तरोन्नति, मर्मत सम्भार, विस्तार तथा निर्माणका लागि हरेक वर्ष अर्बौ रुपैयाँ लगानी गर्ने गर्दै आएको छ। सरकारले सडकमा लगानी गरे अनुसार जनताले प्रतिफल पाउन भने सकेका छैनन् किनभने प्रगति सुस्त छ।

नेपाल जस्तो पहाडै पहाडले भरिएको देशका लागि राजमार्गहरू आर्थिक समृद्धि तथा देश विकासका लागि मेरुदण्ड हुन्। भौतिक पूर्वाधारका दृष्टिले सडक पहिलो आवश्यकता हो। यही आवश्यकता पूरा गर्न सरकारले सडक विकास र मर्मत सम्भारका क्षेत्रमा हरेक वर्ष खर्बभन्दा बढी बजेट छुट्याउने गरेको छ। समयमा काम पूरा नहुँदा एकातिर अर्बौ लगानी खेर गएको छ भने अर्कोतिर जनताले सास्ती भोग्न बाध्य हुनु परेको छ। बलियो र भरपर्दो सडक नहुँदा सडक दुर्घटना बर्सेनि बढ्दै गएको छ।