५२९ जना निजामती कर्मचारीमाथि छानबिन, नयाँ पार्टी घोषणाको तयारीमा धवलशमशेर र दुर्गा प्रसाईं

'लोकान्तर राउण्ड अप'मा पाठकवृन्दलाई स्वागत छ । सधैँझै आज पनि हामी बितेको २४ घण्टाका मुख्यमुख्य घटनाक्रमसहित उपस्थित भएका छौँ-

संयुक्त राज्य अमेरिका र इरानबीच विगत तीन महिनाभन्दा लामो समयदेखि जारी युद्ध अन्त्य गर्ने र विश्वकै महत्त्वपूर्ण 'स्ट्रेट अफ हर्मोज' पुनः सञ्चालनमा ल्याउने ऐतिहासिक सहमति भएको छ । सम्झौताले विगत केही महिनादेखि मन्दी र ऊर्जा सङ्कटको सामना गरिरहेको विश्व अर्थतन्त्रलाई ठूलो राहत दिने संकेत गरेको छ।

मुख्य मध्यस्थकर्ता मुलुक पाकिस्तानका अनुसार आगामी शुक्रबार स्विट्जरल्यान्डमा दुवै देशबिच औपचारिक रूपमा सम्झौतामा हस्ताक्षर हुनेछ। इरानले सम्झौताको पूर्ण पाठ सोही हस्ताक्षर कार्यक्रमपछि मात्रै सार्वजनिक गरिने जनाएको छ।

इरानको आणविक कार्यक्रम जस्ता गम्भीर र जटिल विषयहरूमा भने आगामी दिनहरूमा छलफल गरिने अपेक्षा गरिएको छ।

००००

फिफा विश्वकप २०२६ को समूह ‘एफ’ अन्तर्गत सोमबार बिहान भएको रोमाञ्चक प्रतिस्पर्धामा जापानले नेदरल्याण्ड्सलाई २-२ गोलको बराबरीमा रोक्दै अंक बाँडेको छ। डलास स्टेडियममा भएङ्खेको लको अन्तिम समयमा गोल गर्दै जापानले हार टार्न सफल भएको हो।

००००

अफ्रिकी राष्ट्र आइभोरी कोस्टले फिफा विश्वकप २०२६ मा सानदार शुरूआत गरेको छ। सोमबार बिहान अमेरिकाको फिलाडेल्फियामा सम्पन्न खेलमा आइभोरी कोस्टले बलियो दक्षिण अमेरिकी प्रतिद्वन्द्वी इक्वेडरलाई १–० गोल अन्तरले पराजित गर्दै इतिहास रचेको हो ।

००००

फिफा विश्वकप फुटबल प्रतियोगिता २०२६ अन्तर्गत गएराति भएको खेलमा चार पटकको विश्वकप विजेता जर्मनीले कुरासाओको पोस्टमा गोलको वर्षा गरेको छ ।

अमेरिकाको ह्युस्टन स्टेडियममा सम्पन्न समूह इ को खेलमा जर्मनीले क्यारेबियन राष्ट्र कुरासाओलाई ७–१ गोलअन्तरले पराजित गरेको हो ।

००००

पशुसेवा विभागले काठमाडौँ उपत्यकालगायत बर्डफ्लु पुष्टि भएका १० जिल्लामा करिब सात लाख पन्छी नष्ट गरेको जनाएको छ । प्रभावित क्षेत्रमा रोग नियन्त्रण गर्न पन्छीसहित करिब तीन लाख किलो दाना नष्ट गरिएको हो ।

००००

प्रधानमन्त्री बालेन शाहले आफूसहित दुई मन्त्रीलाई देश बनाउने टोली भनेर स्वघोषणा गरेका छन् ।

सामाजिक सञ्जाल फेसबुकमा आइतबार राति बालेनले गरेको पोस्टमा तीन जनाको फोटो छ । जसमा बालेनले दायाँबायाँ गृहमन्त्री सुदन गुरुङ र पूर्वाधार विकासमन्त्री सुनिल लम्साललाई राखेका छन् । उक्त फोटोसहित बालेनले लेखेका छन्, ‘पीएम (प्रधानमन्त्री), एचएम (गृहमन्त्री), आईएम (पूर्वाधार विकास मन्त्री) । देश बनाउने टोली ।

००००

डा. धवलशम्सेर राणा नेतृत्वको समूह र दुर्गा प्रसाईंको 'नागरिक बचाउ महाअभियान' बीच बृहत्तर राष्ट्रवादी एकता कायम गरी नयाँ राजनीतिक दल निर्माण गर्ने सहमति भएको छ।

नयाँ राष्ट्रवादी पार्टी निर्माणका लागि आइतबार आयोजित एक विशेष कार्यक्रममा जिम्मेवारी हस्तान्तरण तथा परिचयात्मक कार्यक्रम सम्पन्न भएको छ। नयाँ पार्टी छिट्टै घोषणा हुने बताइएको छ ।

००००

बागमती प्रदेशसभाको बैठकमा प्रदेशका आर्थिक मामिला तथा योजनामन्त्री प्रभात तामाङले बागमती प्रदेशको चालु आर्थिक वर्षको आर्थिक सर्वेक्षण २०८२/८३ पेस गरेका छन् ।

आइतबारको बैठकमा सो आर्थिक सर्वेक्षणमा उल्लेख भएअनुसार बागमती प्रदेशभित्र राजस्व असुली गर्ने कार्य उल्लेखित प्रगति भएको उनले जानकारी दिए ।

००००

वालेन्द्र शाह नेतृत्वको सरकारले २०५२ सालमा नै बुझाइएको एक प्रतिवेदनलाई कार्यान्वयन गर्ने निर्णय गरेको छ ।

तत्कालीन मालपोत, नापी र नगरपालिकाका कर्मचारीको मिलेमतोमा व्यक्तिको नाममा पुगेका सार्वजनिक जग्गाको दर्ता बदर गरेर पुनः सरकारको नाममा फिर्ता ल्याउने गरी बालेन सरकारले काम अघि बढाएको हो ।

जेठ २९ गते मन्त्रिपरिषदले ‘सरकारी तथा सार्वजनिक जग्गा छानबिन एवं संरक्षणसम्बन्धी उच्चस्तरीय आयोग अर्थात (रावल आयोग) को प्रतिवेदन २०५२’ कार्यान्वयन गर्ने निर्णय गरेको हो ।

००००

चर्चित सेफ सन्तोष साह दुई दिनदेखि प्रहरी हिरातमा छन् । काठमाडौं जिल्ला अदालतले बैंकिङ कसुर मुद्दामा साहविरुद्ध पक्राउ पुर्जी जारी गरेपछि प्रहरीले उनलाई जनकपुरबाट पक्राउ गरेर काठमाडौं ल्याएको छ ।

काठमाडौं उपत्यका अपराध अनुसन्धान कार्यालयको टोलीले साह र उनको रेस्टुरेन्ट सञ्चालक सदस्यमध्येका एक नारायण साह सुडीलाई पनि नियन्त्रणमा लिएर अनुसन्धान थालेको छ ।

००००

नेपाल राष्ट्र बैंकले सार्वजनिक गरेको प्रतिवेदनले चालु आर्थिक वर्षको पहिलो ६ महिनाको आर्थिक अवस्थाको चित्र प्रस्ट पारेको छ ।

आर्थिक गतिविधि अध्ययन प्रतिवेदनले समग्रमा क्रमिक सुधार देखिए पनि कृषि क्षेत्रमा चुनौती कायम रहेको देखाएको छ ।

चालू आर्थिक वर्षमा मात्रै ५५ अर्ब ८३ करोडको प्रस्तावित विदेशी लगानी छ । तर, लगानी बढ्दा पनि पूर्ण क्षमतामा कुनै पनि उद्योग नरहेको प्रतिवेदनले उल्लेख गरेको छ ।

यता कृषि क्षेत्रमा प्रवाहित कर्जा २.४९ प्रतिशतले घटेर ३ खर्ब ३३ अर्बमा सीमित भएको छ ।

प्रारम्भिक अनुमानअनुसार चालु आर्थिक वर्षमा नेपालको आर्थिक वृद्धिदर ३.८५ प्रतिशत मात्र रहने अनुमान छ, जुन अघिल्लो वर्ष ४.३३ प्रतिशत थियो ।

००००

नेपाली कांग्रेसका नेता डा. शशांक कोइरालाले पार्टी सभापति गगन थापाले सबैलाई मिलाएर लैजान नसकेको आरोप लगाएका छन् । कांग्रेस विभाजित मनस्थितिमा रहेको उनले बताए ।

कांग्रेसको संस्थापन इतर समूहले आइतबार विराटनगरमा आयोजना गरेको कार्यक्रममा कोइरालाले सबैलाई मिलाएर लैजान गगनलाई सुझाव दिएका हुन् । ‘पार्टीका सबै नेतालाई अलग गरेर एक्लै पार्टी चलाउन सक्नु हुन्छ ?,’ उनले प्रश्न गरे, ‘विभाजित मनस्थितिमा रहेको पार्टीलाई एकताबद्ध बनाएर लैजान किन सक्नु भएन ?’

००००

कैलालीको गोदावरीमा टेम्पो भीरबाट खसालिएको घटनाको अनुसन्धानका लागि प्रहरीले ११ जना सरकारी कर्मचारीलाई नियन्त्रणमा लिएको छ।

इलाका प्रहरी कार्यालय मालाखेतीमा चार र जिल्ला प्रहरी कार्यालय कैलालीमा सात जना कर्मचारीलाई राखिएको प्रहरीले जनाएको छ।

००००

बिदा अवधि सकिँदा पनि कार्यालयमा हाजिर नभई सम्पर्कविहीन रहेका ५२९ जना निजामती कर्मचारीमाथि छानबिन शुरू भएको छ ।

राष्ट्रिय किताबखानाको अभिलेख प्रणाली (किताबखाना प्रणाली)को पछिल्लो विश्लेषणले बिदा अवधि सकिएपछि पनि सेवाको नियमित चक्रमा नदेखिएका यी कर्मचारीहरू निष्क्रिय भएको अनुमान गर्दै राष्ट्रिय किताबखानाले विशेष छानबिनका लागि सम्बन्धित मन्त्रालयहरूमा पत्राचार गरेको हो ।