कोप-३१: हिमाल र जलवायु न्यायको पैरवी

यस वर्ष राष्ट्रसंघीय एकतिसौं जलवायु बैठक (कोप–३१) टर्किएको प्राचीन सहर एन्टाल्यामा आउँदो नोभेम्बर ९–२० सम्म हुँदै छ। यस्तै सम्मेलन गतवर्ष ब्राजिलमा भएको थियो, जसले खासै ठुलो सहमति नगरे पनि विकासशील देशहरूका लागि सन् २०३५ सम्म दिइने ठुलो वित्तीय राशि रहेको एनसिक्युजीअन्तर्गत बाकू टू बेलेम फन्ड अघि बढाएको थियो। पृथ्वीको तापमान बढाउन जिम्मेवार रहेको जीवाश्म ऊर्जा जलन अन्त्यको रोडम्याप बनाउन भने ब्राजिल कोप पछि पर्‍यो।

यसपालि टर्किए र अस्ट्रेलियाको सहआयोजनामा यो कोप–३१ बैठक हुन लागेको हो। ठिक यतिबेला प्रशान्त सागरमा सुपर एलनिनो, जापानमा अधिक वर्षा, बेलायत, फ्रान्स र स्पेनको भीषण वन डढेलो, नेपालको हिमनदी विष्फोट र भोटेकोसी बाढीजस्ता प्रकोपहरू बढेकाले पनि पृथ्वीको तापमान १.५ डिग्री से. (जलवायु टिपिङ पोइन्ट) पार गर्‍यो भन्ने चिन्ता सबैतिर देखिन्छ। यही सन्दर्भमा विगतका सबै जलवायु वाचाहरू यथाशीघ्र कार्यान्वयन गर्न जरुरी रहेको भन्दै टर्किएका राष्ट्रपति रेसेप तैयब एर्दोगानले संसारका राष्ट्रप्रमुखहरू र नेपालका प्रधानमन्त्रीलाई पनि कोप–३१ मा निम्तो गरेका छन्।