सीमा क्षेत्रमा निगरानी र विपद् व्यवस्थापन प्रभावकारी बनाइने

गुल्मीको मदाने गाउँपालिका वडा नम्बर-६, पुर्कोटदहमा बसेको अन्तर जिल्ला सुरक्षा समन्वय बैठक सम्पन्न भएको छ।

गुल्मी, अर्घाखाँची र प्यूठान जिल्लाबीचको अन्तरजिल्ला सुरक्षा समन्वय बैठक तीनवटै जिल्लाको सीमावर्ती क्षेत्रको शान्ति सुरक्षा, अपराध नियन्त्रण र आपसी समन्वयलाई प्रभावकारी बनाउने उद्देश्यले सो बैठक आयोजना गरिएको हो।

गुल्मी जिल्लाका प्रमुख जिल्ला अधिकारी बद्रिनाथ गैह्रेको अध्यक्षतामा सम्पन्न उक्त बैठकमा अर्घाखाँचीका प्रमुख जिल्ला अधिकारी तोयनारायण सुवेदी र प्युठानका प्रमुख जिल्ला अधिकारी शान्तिराज प्रसाईं लगायत तीनवटै जिल्लाका सुरक्षा समितिका पदाधिकारीको उपस्थिति रहेको थियो।

बैठकले यसअघि भएका निर्णयहरूको कार्यान्वयन अवस्थाको समीक्षा गर्दै सीमा क्षेत्रमा हुने गैरकानुनी गतिविधि रोक्न सुरक्षा जाँचलाई आपसी समन्वयमा थप प्रभावकारी बनाउने निर्णय गरेको छ।

यसका साथै, जिल्लाबीच सूचना सङ्कलन तथा आदानप्रदानलाई तीव्र बनाउने र सीमा क्षेत्रमा सञ्चालित विकास आयोजनामा देखा परेका समस्याको समाधानमा सहजीकरण गर्ने निर्णय भएको छ।

वर्षायाम नजिकिँदै गरेको सन्दर्भमा सीमा क्षेत्रमा विपद् व्यवस्थापनलाई प्रभावकारी बनाउने, शान्ति सुरक्षा कायम गर्ने तथा खोज, उद्धार एवं आपतकालीन अवस्थाका बारेमा बैठकमा गहन विश्लेषण गरिएको थियो।

बैठकमा जिल्लाहरूमा हुने आपराधिक घटनाहरूको वर्तमान अवस्था र त्यसको न्यूनीकरणका उपायबारे समेत छलफल भएको थियो।

अन्तरजिल्ला समन्वयलाई थप मजबुत बनाउँदै एकअर्काका असल अभ्यासलाई अनुशरण गर्ने जस्ता विविध विषयहरूमा बैठकमा गहन अन्तरक्रिया र छलफल भएको थियो।

बैठकमा सहभागी तीनवटै जिल्लाका प्रमुख जिल्ला अधिकारीहरूले आआफ्नो जिल्लाको वर्तमान सुरक्षा अवस्था, गरिएका कामकाज र देखा परेका चुनौतीहरूका बारेमा गहन प्रस्तुति राख्नुभएको थियो।

यस्ता नियमित समन्वय बैठकबाट विभिन्न विषयमा ज्ञान र अनुभव आदानप्रदान हुनुका साथै आपसी भेटघाट र प्रशासनिक एवं सुरक्षा समन्वयको प्रभावकारितामा वृद्धि हुने विश्वास अधिकारीहरूले व्यक्त गरेका छन्।