आयोजक नेपाल घरमै पराजित

नेपाल साफ यू–१९ च्याम्पियनसिपअन्तर्गत बिहीबार आफ्नो पहिलो खेलमा पाकिस्तानसँग १–० ले पराजित भएको छ । दशरथ रंगशालामा पाकिस्तानले उमेरसमूहको यस प्रतियोगितामा डेब्यु जित निकाल्यो । जितसँगै पाकिस्तानले तीन अंक जोड्यो । अब सेमिफाइनल पुग्न नेपाललाई जित्नैपर्ने दबाब छ । नेपालले शनिबार माल्दिभ्सलाई हराउनुपर्नेछ । प्रतियोगिताको पहिलो खेलमा भारतले बंगलादेशलाई ३–० ले हरायो ।

चार संस्करणसम्म पाकिस्तानले सहभागिता जनाएको थिएन । सार्क राष्ट्रमा अफगानिस्तानसहित आठ राष्ट्रले सहभागिता जनाउँदा पाकिस्तानको यो नै पहिलो सहभागिता हो । भुटान चारपटक सहभागी भएको छ । नेपाल र भारतसँगै बंगलादेश र माल्दिभ्सले समान पाँचपटक प्रतियोगिता खेल्दै छन् । पाकिस्तानको डेब्यु जितमा मिडफिल्डर अली चफरले चलाखीपूर्ण गोल गरेका थिए । खेलको ७६औँ मिनेटमा जफरले ३० यार्ड टाढाबाट प्रहार गरेको बलले सीधै जाली चुमेको थियो । जफरको प्रहार नेपाली गोलरक्षक तथा कप्तान जियारथ शेखले ठम्याउनै सकेनन् ।