केपी ओलीले भने– दोस्रो अध्यक्ष दिन्छु भन्दा पनि माधव नेपालले मानेनन्, अनेक बहाना खोजिरहे

एमाले अध्यक्ष केपी ओलीले दोस्रो अध्यक्ष बनाउन तयार हुँदासमेत वरिष्ठ नेता माधवकुमार नेपालले एकतामा इच्छा नदेखाएको बताएका छन् । केन्द्रीय कमिटीको बुधबारको बैठकलाई सम्बोधन गर्दै ओलीले नेपाललाई दोस्रो अध्यक्ष बनाएर भए पनि पार्टी एकता कायम राख्न आफूले प्रयास गरेको बताएका हुन् । तर, नेपालले एकताप्रति इच्छा नदेखाएको र अनेक बहाना खोजिरहेको ओलीको आरोप छ ।

नेपालले केन्द्रीय कमिटीमा बहुमत चाहियो भनिरहेकोसमेत ओलीले बताए । आफूहरूलाई निकाल्नका लागि केन्द्रीय कमिटीमा बहुमत मागेको दाबी गर्दै ओलीले त्यस्तो हुन नदिने बताएका थिए । नेकपामा हुँदा आफूलाई बहुमतको नाममा साधारण सदस्यबाट निष्कासन गरेको ओलीले स्मरणसमेत गराएका थिए ।