सिराहा प्रकरणपछि टेक जगतको प्रश्न : जफत गरिएका मोबाइलको डेटा कसरी सुरक्षित गर्ने ?

काठमाडौं । सिराहामा परीक्षाका क्रममा जफत गरिएका करिब ५०० थान मोबाइल फोन र स्मार्टवाच पानीमा डुबाएर नष्ट गरिएको घटनाले डिजिटल अधिकार, डेटा सुरक्षा र नागरिकको गोपनीयताको हकबारे गम्भीर बहस सुरु भएको छ । परीक्षालाई मर्यादित र अनुशासित बनाउने उद्देश्यले गरिएको भनिएको यो कदमले अहिले प्रशासनिक अधिकारको प्रयोग, डिजिटल प्रमाणको संरक्षण र नागरिकको निजी सम्पत्तिको सुरक्षामाथि प्रश्न उठाएको छ ।

मोबाइल फोन आज केवल सञ्चारको माध्यम मात्र नभई व्यक्तिको व्यक्तिगत जीवन, वित्तीय कारोबार, शैक्षिक प्रमाणपत्र, तस्बिर, सम्पर्क विवरण र विभिन्न डिजिटल पहिचानसँग जोडिएको उपकरण बनिसकेको छ । यस्तो अवस्थामा सयौँ मोबाइल उपकरणलाई अनुसन्धान र प्रमाण संरक्षणको प्रक्रिया पूरा नगरी नष्ट गर्नुले गम्भीर जोखिम निम्त्याएको विज्ञहरूको धारणा छ ।