एन्फा महिला लिग : चन्द्रपुरको लक्ष्य अब शीर्ष पाँच

तेस्रो चरणसम्म मात्रै दुई अंक जोडेको चन्द्रपुर नगरपालिकाको एन्फा महिला लिगमा एउटै लक्ष्य थियो, रेलिगेसनबाट उत्रिने । तर, अहिले चन्द्रपुरको लक्ष्य फेरिएको छ । अब उसले रेलिगेसनबाट जोगिन होइन, शीर्ष पाँचमा अटाउन प्रतिस्पर्धा गर्ने भएको छ । एकाएक यसरी उसको लक्ष्य परिवर्तन हुनुमा कुनै आश्चर्य मान्नुपर्ने कुरा नै छैन । यो त सातदोबाटोस्थित एन्फा कम्प्लेक्समा शुक्रबार सुदूरपश्चिम प्रदेशविरुद्ध हात लागेको ४–० को नतिजाको परिणाम हो । यो जितले चार खेलबाट ५ अंक जोडेको चन्द्रपुरलाई अर्को चरणमा पुग्न अटाउनुपर्ने एक स्थानमात्रै तल पुर्‍याइदिएको छ ।

‘सुदूरपश्चिमविरुद्ध जसरी पनि तीन अंक लिने योजनासहित आएका थियौं । त्यो पूरा भयो । अन्य क्लब अलिक तलै छ । त्यसैले अब शीर्ष पाँचमा अटाउन खेल्नेछौं,’ मुख्य प्रशिक्षक पारस चौधरी भन्छन् । यसअघि अंकतालिकामा जति कमजोर चन्द्रपुर देखिन्थ्यो त्यति मैदानमा भने थिएन । तर, नेपाली राष्ट्रिय टोलीको उमेरसमूहबाट खेलिसकेकी फरवार्ड सेनु परियारको चोटले चन्द्रपुर फिनिसिङ थर्डमा निकै कमजोर देखियो । त्यसैले कर्णाली प्रदेश र संकटा फुटबल क्लबसँग बराबरी खेल्दै अंक बाँड्न बाध्य बन्यो । त्यही चार अंक गुमाएसँगै चन्द्रपुर अंकतालिकामा पुछारतिर धकेलिँदै गयो भने बागमती युथ क्लब र संकटा माथि माथि चढ्दै गए । त्यसमा अलिकति घाउ भने विभागीय टोली एपिएफले थपेको प्रशिक्षक चौधरी बताउँछन् । ‘दुई खेलमा जित हात पार्नुपर्ने थियो । तर, खेलाडीको इन्जुरी पनि फरक पार्‍यो । एपिएफसँग पनि एक अंक हात पार्ने लक्ष्यसहित आएका थियौं, तर ६ गोल खान पुग्यौं । त्यसैले हामी तलको तलै पर्न गयौं,’ उनी भन्छन् ।