आउनुस्, हाम्रो सामुदायिक विद्यालयलाई जोगाऔँ !

झन्डै डेढ दशकयता सामुदायिक विद्यालयमाथि स्थानीय विशेषताअनुसार विकसित चुनौतीका चाङहरू थुप्रिएका छन् । समुदायको पहिलो र अग्रणी पुस्ताले हाम्रा लागि बनाइदिएका, चिनाइदिएका र उभ्याइदिएका यी विद्यालयहरू चुनौतीको चाङमुनि देखिनु र समस्याग्रस्त भेटिनु साक्षर र सचेत पङ्क्तिका लागि किमार्थ राम्रो होइन ।

यसको गम्भीर असर र प्रभावस्वरूप एकातिर सामुदायिक विद्यालयको शैक्षिक उन्नयनका लागि सरकारले लगानी गरेको प्रतिबालक ३९ हजार ७ सय ९३ रुपैयाँ वार्षिक बालुवामा पानी खन्याएसरह भएको छ । अर्कोतिर सामुदायिक विद्यालयको विकल्पमा सञ्चालनमा ल्याइएका अन्यान्य प्रकृतिका विद्यालयले स्थानीय समुदायलाई अलमल र द्विविधा मात्र सिर्जना गरेका छैनन्, बरु उपलब्ध शिक्षा र शिक्षणको एकोहोरो भार र थचक्क थचिनुपर्ने मार सहन बाध्य बनाएका छन् ।