ह्याम्स अस्पतालमा उपचाररत दावा शेर्पाको कस्तो छ अवस्था ?

काठमाडाैं । सर्वोच्च शिखर सगरमाथा क्षेत्रको अत्यधिक प्रतिकूल र चुनौतीपूर्ण मौसममा ६ दिन बेपत्ता भएका ५७ वर्षीय दावा शेर्पाको जीवितै उद्धार गरी हाल काठमाडौँको धुम्बाराहीस्थित ह्याम्स अस्पतालमा उपचार भइरहेको छ। अस्पतालले आज एक प्रेस विज्ञप्ति जारी गर्दै उनको स्वास्थ्य अवस्थाबारे जानकारी गराएको छ ।

अस्पतालका अनुसार, उद्धार गरी अस्पताल ल्याइपुर्‍याउँदा शेर्पामा कडा खालको जलवियोजन देखिएको थियो। साथै, अत्यधिक चिसोका कारण उनका दुवै हातका कान्छी औंलाहरू ग्रेड २ फ्रोस्टबाइट अर्थात् चिसोले खाएको र दाहिने हातको बुढी औंला तथा माझी औंलामा ग्रेड १ फ्रोस्टबाइट भएको पाइएको छ। यसका अतिरिक्त उनको दाहिने घुँडाको हड्डीमा गम्भीर चोट लागेकाे र तिघ्राको भित्री मांसपेशीमा रगत जमेको अवस्था फेला परेको छ।