जंगल बचाउन जुम्लामा ग्यास चुल्हो वितरण, गाउँमै पाएपछि स्थानीय दंग

जुम्लाको गुठिचौर गाउँपालिका–१ डिल्लीकोट गाउँमा वातावरण संरक्षण तथा जंगल बचाउनका लागि एक घर एक ग्यास चुल्हो उपलब्ध गराइएको छ। वडा नम्बर १ ले सबैको घरमा ग्यास सिलिन्डर र चुल्हो उपलब्ध गराएर वातावरण संरक्षणसँगै जंगल बचाउने अभियान थालेको हो। गाउँमै ग्यास चुल्होमा खाना पकाउन पाउने भएपछि स्थानीयवासी दङ्ग छन्।

स्थानीय लालकोसा कामीले धुवाँरहित वडा बनाउनका लागि ठूलो सहयोग पुगेको बताउँछिन्। ‘वर्षौंदेखि धुवाँले आँखा पिरो हुँदासम्म खाना पकाउन बाध्य थियौँ,’ उनले भनिन्, ‘अहिले ग्यास चुल्होमा खाना पकाउन पाउँदा खुसी छौँ।’ गुठिचौर गाउँपालिका–१ डिल्लीकोट गाउँका ५० घरमा ग्यास चुल्हो वितरण गरिएको छ। उक्त गाउँमा दलित बस्ती मात्रै छ।