युक्रेनमाथि रुसले हवाई आक्रमण गर्दा ९ जनाको मृत्यु

युक्रेनका विभिन्न शहरहरूमा रुसले गरेको भीषण मिसाइल तथा ड्रोन आक्रमणमा परी ९ जनाको मृत्यु भएको छ भने कैयौँ मानिसहरू घाइते भएका छन्। यस आक्रमणका क्रममा राजधानी किभमा रहेको ११ औँ शताब्दीको ऐतिहासिक धार्मिक स्थल ‘डोर्मिसन क्याथेड्रल’ मा ठूलो आगलागी हुनुका साथै गम्भीर क्षति पुगेको छ।

युक्रेनी अधिकारीहरूका अनुसार राजधानी किभमा भएका आक्रमणहरूमा ४ जना नागरिकको ज्यान गएको छ। त्यस्तै, उत्तर-पूर्वी शहर खार्किभमा रुसी आक्रमणपछि सल्किएको आगो निभाउने क्रममा ५ जना उद्धारकर्मीको मृत्यु भएको छ।