नेपाल सामान ढुवानी व्यवसायी संघको अध्यक्षमा अच्युतराज खनाल पुनः निर्वाचित

भक्तपुर / नेपाल सामान ढुवानी व्यवसायी संघको अध्यक्षमा अच्युतराज खनाल पुनः निर्वाचित भएका छन्। भक्तपुरस्थित होटल घ्याम्पेडाँडामा सम्पन्न १९औँ वार्षिक साधारणसभा तथा ७औँ अधिवेशनले खनालको नेतृत्वमा नयाँ कार्यसमिति चयन गरेको हो।

अधिवेशनबाट अध्यक्ष, सचिव र कोषाध्यक्ष बाहेकका अधिकांश पदमा सर्वसम्मत रूपमा कार्यसमिति चयन गरिएको संघले जनाएको छ।

नवनिर्वाचित कार्यसमितिअनुसार वरिष्ठ उपाध्यक्षमा अरुणकुमार श्रेष्ठ, उपाध्यक्षमा धिरज जोशी, सचिवमा टेकराज पोखरेल, सहसचिवमा पवन सिलवाल र कोषाध्यक्षमा चुडामणि खतिवडा निर्वाचित भएका छन्।

त्यसैगरी सदस्यहरूमा श्रद्धा श्रेष्ठ, राजीव खड्का, अनिल पन्त, ज्ञानेन्द्र गौडेल र वेदप्रसाद पोखरेल चयन भएका छन्।

निर्वाचन अधिकृत देवराज भण्डारीले पदाधिकारी तथा सदस्यहरूको नामावली सार्वजनिक गर्दै नयाँ कार्यसमितिलाई सफल कार्यकालको शुभकामना व्यक्त गरेका छन्।

कार्यक्रममा बोल्दै राष्ट्रिय स्वतन्त्र पार्टीका सांसद तथा पूर्वाधार समितिका सभापति आशिष गजुरेलले ढुवानी व्यवसायलाई व्यवस्थित बनाउन सरकार सचेत रहेको बताए। उनले उपत्यकामा छिट्टै ट्रान्सपोर्ट नगर निर्माण गर्ने योजना रहेको उल्लेख गर्दै भिसिटिएस लगायतका विषयमा अध्ययन भइरहेको जानकारी दिए।

नवनिर्वाचित अध्यक्ष खनालले ढुवानी व्यवसायलाई व्यवस्थित र सुदृढ बनाउन सबैसँग सहकार्य गर्दै अघि बढ्ने प्रतिबद्धता व्यक्त गरेका छन्।

संघले “राष्ट्र निर्माणको आधार, सुरक्षित ढुवानीको समृद्ध व्यापार” भन्ने नारासहित ढुवानी व्यवसायको विकास, व्यवसायीको हकहित संरक्षण र क्षेत्रको आधुनिकीकरणमा काम गर्दै आएको जनाएको छ।