हुलाकमार्फत सेवाग्राहीका घरघरमा राहदानी पुर्‍याइने

राहदानी प्राप्त गर्न आवेदन दिएका सेवाग्राहीले अब हुलाकबाट सेवा प्राप्त गर्ने भएका छन् । हुलाकबाटै राहदानी सेवाग्राहिका घरसम्म वितरण गर्न जिल्ला प्रशासन कार्यालय पाँचथर र जिल्ला हुलाक कार्यालयबिच समझदारी भएको हो ।

जिल्ला हुलाक कार्यालय पाँचथर निमित्त प्रमुख दुर्गबहादुर सम्वाहाम्फेले सार्वजनिक सूचना जारी गर्दै अब व्यक्तिगत गोपनियता र कागजातकुरक्षा सहित आवेदकका घरैमा लगेर वितरण गर्ने जानकारी दिनुभयो ।

नेपाल सरकारको “शासकीय सुधार सम्बन्धी एक सय कार्यसूची” अन्तर्गत हुलाक सेवालाई ‘गभर्मेन्ट कुरियर सर्भिस’ का रूपमा विकास गर्ने अवधारणाअनुसार जिल्ला प्रशासन कार्यालय पाँचथर र जिल्ला हुलाक कार्यालय पाँचथरबीच समझदारीपत्र (एमओयू) मा हस्ताक्षर भएपछि यस्तो व्यवस्था लागू गरिएको सम्वाहाम्फेले बताउनुभयो ।

यसबाट सेवाग्राहीले राहदानी लिन कार्यालय धाउनुपर्ने झन्झट हट्नुका साथै समय र खर्चसमेत बचत हुने विश्वास आम नागरिकको छ ।

कार्यालयका अनुसार सार्वजनिक सेवा प्रवाहलाई थप सरल, सहज र प्रभावकारी बनाउने उद्देश्यसहित सुरु गरिएको यो सेवाबाट “नागरिकको घरदैलोमा सरकार” भन्ने अवधारणालाई व्यवहारमा उतार्ने अपेक्षा नागरिकले गरेका छन् ।

हुलाक मार्फत राहदानी वितरण गर्दा कागजातको सुरक्षा, गोपनीयता र छिटो वितरणलाई उच्च प्राथमिकतामा राखिने जनाइएको छ । साथै, सेवालाई थप प्रभावकारी बनाउन सरोकारवाला निकाय र सेवाग्राहीबाट सकारात्मक सहयोगको अपेक्षा गरिएको जिल्ला हुलाक कार्यालय पाँचथरले जनाएको छ ।