कैलालीमा वन कर्मचारीले टेम्पो भीरबाट खसालेको घटना छानबिनका लागि समिति गठन

काठमाडौँ । कैलालीको गोदावरीमा वन कर्मचारीले एक सर्वसाधारणको टेम्पो भीरबाट खसालेको घटनाको सत्यतथ्य पत्ता लगाउन छानबिन समिति गठन गरिएको छ । कैलालीको गोदावरी नगरपालिका-४ स्थित गाईमारे चुरे वन क्षेत्रमा डिभिजन वन कार्यालयका कर्मचारीले टेम्पो भीरबाट खसालेको भिडिओ सामाजिक सञ्जालमा भाइरल भएपछि सुदूरपश्चिम प्रदेश सरकारले सक्रियता देखाएको हो।

सुदूरपश्चिम प्रदेशको उद्योग, पर्यटन, वन तथा वातावरण मन्त्रालयले प्रदेश वन निर्देशक हेमराज विष्टको संयोजकत्वमा पाँच सदस्यीय छानबिन समिति गठन गरेको छ । समितिका सदस्यहरूमा सहायक प्रमुख जिल्ला अधिकारी किरण जोशी, वरिष्ठ डिभिजनल वन अधिकृत जनक पाध्याय, यातायात व्यवस्था कार्यालयका मेकानिकल इन्जिनियर धोजराज जोशी र मन्त्रालयका कानुन अधिकृत विजयराज ओझा रहेका छन् । मन्त्रालयका प्रवक्ता भरतप्रसाद श्रेष्ठका अनुसार समितिलाई सात दिनभित्र प्रतिवेदन पेस गर्न निर्देशन दिइएको छ ।