आर्य र कोनोली चम्किँदा पञ्जाबको सानदार जित, शीर्ष स्थानमा पकड बलियो

काठमाडौँ । जारी इन्डियन प्रिमियर लिगमा प्रियांश आर्य र कुपर कोनोलीको विष्फोटक ब्याटिङको मद्दतमा पञ्जाब किंग्सले लखनउ सुपर जायन्ट्सलाई ५४ रनको फराकिलो अन्तरले पराजित गरेको छ । यो जितसँगै पञ्जाबले अंक तालिकाको शीर्ष स्थानमा आफ्नो पकड थप बलियो बनाएको छ ।

पहिले ब्याटिङ गरेको पञ्जाबले निर्धारित २० ओभरमा ७ विकेट गुमाएर २५४ रनको विशाल योगफल तयार पारेको थियो । पञ्जाबका लागि प्रियांश आर्यले मात्र ३७ बलमा ९३ रनको आक्रामक पारी खेले भने कुपर कोनोलीले ४६ बलमा ८७ रन जोडे । लखनउका लागि प्रिन्स यादव र एम सिद्धार्थले समान २–२ विकेट लिए ।