विपद्मा ज्यान गुमाएकाप्रति राष्ट्रपतिको श्रद्धाञ्जली, बेपत्ताको खोजीमा विशेष ध्यान दिने प्रतिबद्धता

राष्ट्रपति रामचन्द्र पौडेलले पछिल्लो समय देशका विभिन्न क्षेत्रमा आएको बाढीपहिरोलगायतका प्राकृतिक विपद्मा परी ज्यान गुमाउनेप्रति श्रद्धाञ्जली अर्पण गर्दै बेपत्ता तथा सम्पर्कविहीन नागरिकको खोजीलाई सरकारले विशेष प्राथमिकता दिने बताएका छन्।

राष्ट्रका नाममा सम्बोधन गर्दै राष्ट्रपति पौडेलले विपद्का कारण पीडित नागरिकको उद्धार, राहत तथा पुनर्स्थापनामा राज्यको सम्पूर्ण शक्ति परिचालन गर्नुपर्नेमा जोड दिए। विपद्को यस कठिन घडीमा पीडित नागरिकले राज्य आफ्ना साथमा रहेको अनुभूति गर्न सक्ने गरी प्रभावकारी रूपमा काम गर्न उनले सरकारलाई आग्रह गरे।