हाम्रो अर्थतन्त्र लयमा फर्किन सकेको छैन :अर्थमन्त्री

काठमाडौँ। अर्थमन्त्री डा. स्वर्णिम वाग्लेले जेनजी आन्दोलनपछि नेपालको आर्थिक गतिविधिमा मन्दी छाएको बताएका छन्। सोमबार राष्ट्रिय सभा बैठकमा आगामी आर्थिक वर्षको बजेटबारे सांसदहरूले उठाएका प्रश्नहरूको जवाफ दिने क्रममा उनले यस्तो कुरा बताएका हुन्।

अर्थमन्त्री वाग्लेले जेनजी आन्दोलनपछि मुलुकको राजनीतिले कोल्टे फेरेको उल्लेख गर्दै त्यसैलाई न्याय दिने हिसाबले सरकारले आफ्ना नीति, कार्यक्रम र बजेट तय गरेको स्पष्ट पारे। कोभिड महामारीपछि मुलुकको अर्थतन्त्र अझै पनि पूर्ण रूपमा लयमा फर्किन नसकिरहेको भन्दै उनले शिथिल बनेको आर्थिक गतिविधिलाई चलायमान बनाउने उद्देश्यका साथ नै सरकारले नयाँ बजेट ल्याएको दाबी गरे। बजारमा निजी क्षेत्रको लगानी समेत निकै सुस्त भएकाले उनीहरूलाई उत्साहित बनाउँदै आर्थिक गतिविधिलाई अघि बढाउन सरकार प्रतिबद्ध रहेको उनको भनाइ थियो।