विपक्षीलाई सुन

संसदीय व्यवस्था भएका मुलुकमा सरकार सत्तापक्षको र संसद्चाहिँ विपक्षीको भन्ने मान्यता रहँदै आएको छ। यसको मतलव त्यहाँ विपक्षीले उठाउने आवाज गम्भीर भएर सुन्नुपर्छ भन्ने हो। अर्को अर्थमा भन्दा संसदीय व्यवस्थाको सुन्दरता आलोचना र प्रतिक्रियामा अडेको मानिन्छ। त्यसैले पनि सरकारका गलत क्रियाकलापदेखि उसले अवलम्बन गर्ने मार्गले समेत देश र जनतालाई भड्खालोमा नहालोस् भनेर सचेत गराउन विपक्षीको भूमिका महत्त्वपूर्ण मानिन्छ।

नेपालको संसद् धेरैजसो विवादमा रहने गरेको देखिन्छ। विपक्षमा रहनेले आवश्यक/अनावश्यक जेसुकै पनि माग राख्ने र सत्तापक्षमा हुनेले बाध्यतामा बाहेक त्यसलाई स्वीकार नगर्ने प्रवृत्ति दर्जनौँ पटक देखिएको छ। यस्तो अवस्थाले नेपालको संसद् महिनौँसम्म पनि अवरुद्ध हुँदै आएको छ। यसरी संसद् अवरुद्ध हुँदा एकातिर मुलुकले संघीय व्यवस्थाअनुकूल तुल्याउन निर्माण र संशोधन गर्नुपर्ने कानुनहरू बन्न सकेका छैनन् भने अर्कोतर्फ दैनिक खर्च ‘बालुवामा पानी’ सरह भइरहेको छ। अझ विडम्बना त यो छ कि संसद् अवरुद्ध भएको दिनको समेत भत्ता बुझिरहेका हुन्छन् सांसदहरू।