परराष्ट्रमन्त्री खनाल र सीपीसी विदेश विभाग प्रमुख लिउबीच भेटवार्ता

चीन भ्रमणमा रहेका परराष्ट्रमन्त्री शिशिर खनालले चिनियाँ कम्युनिस्ट पार्टी (सीपीसी), अन्तर्राष्ट्रिय विभाग (आईडीसीपीसी)का प्रमुख लिउ हाइसिङसँग भेटवार्ता गरेका छन् । सोमबार बेइजिङमा भएको भेटवार्तामा प्रमुख लिउले सीपीसीले राष्ट्रिय स्वतन्त्र पार्टीसँग मैत्रीपूर्ण सम्बन्ध विकास गर्न चाहेको बताए ।

चीन-नेपाल सम्बन्धको विकासमा राजनीतिक दलहरूको योगदानबारे चर्चा गर्दै लिउले सीपीसीको अवधारणा र अनुभवहरू पनि सुनाए । जनताकेन्द्रित दर्शन र साहसिक आत्मसुधारको प्रतिबद्धतामा उनले अनुभव बाँडेका हुन् ।

भेटवार्तामा परराष्ट्रमन्त्री शिशिर खनालले ७० वर्ष लामो कूटनीतिक सम्बन्धमा नेपाल र चीनले एकअर्कालाई निरन्तर सम्मान, समान व्यवहार र शान्तिपूर्ण सहअस्तित्वका पाँच सिद्धान्तहरूमा आधारित मैत्रीपूर्ण सम्बन्ध विकास गरेका बताए ।

नेपालले एक चीन सिद्धान्तलाई दृढतापूर्वक पालना गर्ने र कुनै पनि शक्तिलाई चीनविरोधी गतिविधिहरूका लागि आफ्नो क्षेत्र प्रयोग गर्न कहिल्यै नदिने पनि उनले प्रस्ट पारे । चिनियाँ कम्युनिस्ट पार्टीको नेतृत्वमा चीनले हासिल गरेको विकास र उपलब्धिहरूको कदर गर्दै नेपालले पनि वैज्ञानिक तथा प्राविधिक नवप्रवर्तन, जलविद्युत्, कृषि, संस्कृति र पर्यटनजस्ता क्षेत्रहरूमा सम्पर्क सञ्जाललाई अझ अगाडि बढाउन र पारस्परिक लाभदायक सहयोगलाई सुदृढ पार्न चीनसँग काम गर्न इच्छुक रहेको उनले बताए ।

कुराकानीका क्रममा लिउले चीन र नेपाल पहाड र नदीहरूले जोडिएको र पुस्तौँदेखिका मित्र भएको बताउँदै विश्वका विभिन्न आकारका देशहरूबीच समानता र मैत्रीपूर्ण सहअस्तित्वको लागि एक मोडेल स्थापित गरेको बताए ।

प्रकाशित मिति: सोमबार, असार १, २०८३

१७:४९