भ्रष्टाचारले मक्किएका संरचना

कम्बल ओढेर घिउ खान माहिर हाम्रा शासक–प्रशासकहरु बाहिर एउटा कुरा गर्ने र भित्र ठ्याक्कै उल्टो काम गर्ने चरित्रका छन् । उनीहरुले पाएसम्म कुम्ल्याउने गरेका छन् । तर बाहिर–बाहिर सबैभन्दा ठूला कुरा उनीहरु नै गर्ने गर्छन् ।

तिनै शासक–प्रशासकहरुले कैयौँ वर्षदेखि भ्रष्टाचारमा शून्य सहनशीलताको विषय उठाउँदै आइरहेका छन् । तर पनि यहाँका सबैजसो सरकारी संयन्त्रहरु भ्रष्टाचारले मक्किने क्रम बढ्दो छ । तीनवटै सरकारका प्रायजसो सबै संयन्त्रहरु भ्रष्टाचारको दलदलमा परेर पक्षघातका बिरामीजस्ता भएका छन् । जसका कारण ती सरकारी निकायले जनताका तमाम खाले समस्या समाधानका लागि कहिल्यै कुनै कार्य गरेनन् । ती निकायमा रहनेहरु अधिकांश भ्रष्ट चरित्रका छन् । कसरी हुन्छ धन कमाउनेमा नै उनीहरु लिप्त छन् । आम जनताका गाँस, बास, कपास, स्वास्थ्य, शिक्षा, रोजगारीजस्ता समस्याहरुलाई कसरी समाधान गर्ने भन्नेमा उनीहरु कहिल्यै पनि संवेदनशील बनेको देखिँदैन । यसका कारण शासकीय व्यवस्थामाथि नै गम्भीर चुनौती खडा भइरहेको छ ।