कोशीको बजेट ४० अर्ब ४४ करोड, आइतबारको बिदा पुनरावलोकन गर्ने, तान्त्रिक अध्ययन केन्द्र स्थापना गर्ने पूर्वाधारमा जोड

विराटनगर ।

कोशी प्रदेश सरकारले आगामी आर्थिक वर्ष २०८३, ८४ का लागि ४० अर्ब ४४ करोड ५८ लाख रुपैयाँको बजेट सार्वजनिक गरेको छ । चालू आर्थिक वर्षको तुलनामा १२ दशमलव ७४ प्रतिशतले ठूलो आकारको बजेट ल्याउँदै प्रदेश सरकारले पूर्वाधार विकास, सेवा प्रवाह तथा आर्थिक गतिविधि विस्तारलाई प्राथमिकतामा राखेको जनाएको छ । प्रदेश सभामा सोमबार आर्थिक मामिला तथा योजनामन्त्री विदुरकुमार लिङ्थेपले बजेट प्रस्तुत गर्दै कुल विनियोजनमध्ये चालूतर्फ १३ अर्ब ९७ करोड ६३ लाख रुपैयाँ, पुँजीगततर्फ २० अर्ब ७५ करोड ९९ लाख रुपैयाँ, वित्तीय व्यवस्थातर्फ १५ करोड रुपैयाँ तथा वित्तीय हस्तान्तरणतर्फ ५ अर्ब ५६ करोड ३६ लाख रुपैयाँ छुट्याइएको जानकारी दिनुभयो । बजेट संरचनाले विकास निर्माण तथा पूर्वाधार विस्तारमा केन्द्रित हुने संकेत गरेको छ । कुल बजेटमध्ये पुँजीगत खर्चको हिस्सा सबैभन्दा ठूलो रहेको छ, जसले प्रदेश सरकारको विकासमुखी प्राथमिकतालाई प्रतिबिम्बित गरेको छ।