सवारी दुर्घटनाका पीडितका लागि रक्तदान

काठमाडौँ । काठमाडौँ उपत्यका ट्राफिक प्रहरी कार्यालयले सडक सवारी दुर्घटनाका पीडितको सहयोगार्थ आज रक्तदान कार्यक्रम आयोजना गरेको छ । ‘सवारी दुर्घटना न्यूनीकरण विशेष अभियान तथा ट्राफिक सप्ताह–२०८२’ को पूर्वसन्ध्यामा शुक्रबार आयोजित उक्त कार्यक्रममा १३९ जनाले रक्तदान गरेको उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीले जानकारी दिए ।

उनका अनुसार कार्यक्रममा काठमाडौँ उपत्यकामा कार्यरत ट्राफिक प्रहरी, सशस्त्र प्रहरी, महानगर प्रहरी बल, सञ्चारकर्मी तथा सर्वसाधारणको उपस्थिति थियो । कार्यक्रमको उद्घाटन गर्दै काठमाडौँ उपत्यका ट्राफिक प्रहरी कार्यालयका प्रमुख एवं प्रहरी वरिष्ठ उपरीक्षक नवराज अधिकारीले पहिलो रक्तदान गरेका थिए । उनले ट्राफिक सप्ताह–२०८२ को पूर्वसन्ध्यामा आयोजना गरिएको यो कार्यक्रमले ट्राफिक प्रहरीको सामाजिक उत्तरदायित्व र मानवताप्रतिको संवेदनशीलता उजागर गरेको बताए ।