पाँच गोलको थ्रिलरमा आर्सनलको उत्कृष्ट पुनरागमन

लण्डन । म्यानचेस्टर युनाइटेडलाई हराउँदै आर्सनलले प्रिमियर लिगको शीर्ष स्थानमा आफ्नो पकड बलियो बनाएको छ । आइतबार राति पाँच गोलको रोमाञ्चक खेलमा आर्सनल ३–२ गोलअन्तरले विजयी बनेको हो । म्यानचेस्टर सिटीले वुल्भ्सलाई हराएपछि दबाबमा रहेको आर्सनलले उत्कृष्ट जवाफ दिँदै शीर्ष स्थानमा पाँच अंकको अग्रता कायम गर्न सफल रह्यो ।

खेलमा अग्रता भने युनाइटेडले लिएको थियो । खेलको १७ औँ मिनेटमा २५ यार्ड टाढाबाट उत्कृष्ट गोल गर्दै मार्कस रासफोर्डले पाहुना टोलीलाई अग्रता दिलाएका थिए । तर लगत्तै एडी एनकेटियाले ग्रानिट जाकाको क्रसमा आर्सनललाई खेलमा फर्काए ।